Mwenyekiti wa Amnesty International nchini Uganda Jaji mstaafu Peter Onega, amesema idadi kubwa ya waliosamehewa (13,291) wanatoka kundi la Lord’s Resistance Army – LRA, linaloongozwa na Joseph Kony.
Wengine wanatoka makundi ya waasi ya West Nile Bank Front – WNBF (6,500), National Rescue Front – UNRF (3,252) na Allied Democratic Forces - ADF (2,315), ambalo muasisi wake ni Jamil Mukulu mwenye umri wa miaka 55, anayezuiliwa Uganda baada ya kukamatwa nchini Tanzania, April mwaka 2015.
ADF yataka mazungumzo na serikali
Onega amesema uongozi wa kundi la ADF unataka kufanya mazungumzo na serikali ili kumaliza uasi wa miaka 22, akifafanua kwamba kundi hilo lilimteua kiongozi mwingine baada ya kukamatwa kwa Jamil Mukulu, na kwamba Amnesty International imekuwa ikifanya mazungumzo na kundi hilo tangu mwaka 2008.
Office ya Amnesty International ya Uganda, bado inashughulikia maombi ya waasi 5,671wanaotaka msamaha wa serikali.
Onega amesema kwamba serikali ya rais Yoweri Museveni ipo tayari kwa mazungumzo na kundi hilo la ADF ambalo linaaminika kujificha nchini jamhuri ya kidempkrasia ya Congo na kushutumiwa kutekeleza mauaji ya watu mashuhuri nchini Uganda akiwemo mbunge Ibrahim Abiriga, na mwendesha mashtaka Joan Kagezi.
Kikundi cha ADF
Ni kundi lililoundwa na Jamil Mukulu mwaka 1989, mashariki mwa Uganda. ADF liliundwa kupinga kile kinachotajwa kama kutengwa na serikali katika maendeleo
Dhamira ya kundi hilo ni kupindua utawala wa Rais Yoweri Museveni pamoja na kuanzisha utawala wa Sharia ya Kiislam nchini Uganda.
Kundi hilo limekuwa Likifanya uasi dhidi ya serikali ya Uganda upande wa mashariki ya Jamhuri ya Kidemokrasia ya Congo ( DRC).
Limeshutumiwa kutekeleza mauaji mengi Uganda hususan dhidi ya maafisa wa ngazi ya juu serikalini. Linaaminika kuwa na wapiganaji wasiozidi 500.
Imetayarishwa na mwandishi wetu, Kennes Bwire, Washington, DC
