Kwa mujibu wa shirika la habari la Reuters, miongoni mwa wakurugenzi wa Coca Cola waliokutana na Tinubu, ni pamoja na John Murphy ambaye ni rais na mkuu wa fedha, na Zoran Bogdanovic, mkurugenzi mkuu wa HBC ambayo ni mojawapo ya makampuni ya kutengeneza chupa za Coca Cola.
Bogdanovic aliambia Tinubu kwamba tangu 2013, Coca Cola imewekeza dola bilioni 1.5 nchini Nigeria, kama hatua ya kuongeza uzalishaji, usambazaji, mafunzo na maendeleo. Tangazo hilo limekuja baada ya utawala wa Tinubu kushuhudia makampuni kadhaa ya kimataifa kama vile Proctor & Gamble,na Bayer AG, yakiondoka nchini humo, kutokana na uhaba wa fedha za kigeni.
Tinubu ambaye amekuwa ofisini tangu Mei mwaka jana alisema kuwa serikali yake ina azma ya kuweka mazingira bora ya kufanyia biashara. Nigeria yenye zaidi ya wakazi milioni 200, ni soko la kuvutia kwa makampuni mengi ya kimataifa, ingawa uhaba wa fedha za kigeni pamoja na sera ngumu za kufanya biashara, zimevunja moyo baadhi ya wawekezaji.