Katika miaka ya karibuni, joto kali lililochochewa na mabadiliko ya hali ya hewa limeongezeka zaidi katika sehemu nyingi za India, wanasema wataalam.
Wiki iliyopita, zaidi ya vifo 100 vimeripotiwa katika majimbo mawili yenye idadi kubwa ya watu huko kaskazini na mashariki, lakini haijulikani iwapo vinahusishwa na joto kali lililovuka nyuzi joto digrii 42 Celsius.
Huko Uttar Pradesh, mamlaka zilisema wanachunguza iwapo vifo vya watu 68 waliokuwa wamelazwa hospitali ya serikali katika wilaya ya Ballia vilihusishwa na joto. Vifo hivyo vilitokea katika kipindi cha siku tano kati ya Alhamisi na Jumatatu.
Huko Bihar, maafisa wamesema kuwa joto linalofukuta liliuwa watu tisa na wengine wengi wamelazwa hospitali kutokana na maradhi yanayotokana na joto.
Waziri wa Afya wa India, Mansukh Mandaviya, alisema Jumanne kuwa “mipango itafanyika katika kila ngazi kwa ajili ya kulinda maisha ya mtu wa kawaida. Tunataka kuhakikisha hakuna mtu anayekufa kutokana joto.”
Alisema Baraza la Utafiti wa Tiba la India (ICMR) litaandaa mipango ya muda mrefu na mfupi kuweza kupunguza athari hasi za joto. ICMR ni taasisi kuu ya utafiti wa afya India.
Forum