Msururu wa makombora ya Russia Jumatano yameulenga mji mkuu wa Ukraine na kujeruhi watu 45, huku Rais Volodymyr Zelenskiy akiwasihi maafisa wa Marekani kuidhinisha msaada mpya wa kijeshi wa dola bilioni 61 kuisaidia nchi yake kupambana na kumaliza uvamizi wa Russia.
Jeshi la anga la Ukraine limesema mifumo yake ya anga ilitungua makombora yote ya masafa marefu yaliyorushwa na Russia.
Mabaki ya makombora yaliyorushwa na ndege zisizokuwa na rubani yaliharibu hospitali moja ya watoto na mfumo wa maji, meya wa mji wa Kyiv Vitaly Klitschko amesema.
Zelenskiy alisema leo kwenye mitandao ya kijamii “ Russia imethibitisha kwa mara nyingine kuwa ni nchi yenye ukatili kwa kurusha makombora usiku, ikijaribu kushambulia maeneo ya makazi, shule za chekechea na miundombinu ya nishati wakati wa msimu wa baridi.”
Utawala wa Biden Jumanne ulitangaza msaada mpya wa kijeshi wa hadi dola milioni 200 kwa Ukraine.