Habari

Putin asema iko tayari kwa mashauriano juu ya vita vya Ukraine

Rais wa Russia Vladimir Putin akizungumza wakati wa mkutano na viongozi wa kijeshi, huko Tula, Russia, Disemba 23, 2022. Picha ya AP

Rais wa Russia Vladimir Putin amesema Russia iko tayari kwa mashauriano juu ya vita vya Ukraine na ameilaumu Ukraine na washirika wake wa Magharibi kwa kushindwa kufanikisha mazungumzo, msimamo ambao Washington uliuupuzia kutokana na mashambulizi yanayoendelea ya Russia.

"Tuko tayari kushauriana na kila mtu aliyehusika kuhusu suluhu zinazokubalika, lakini ni juu yao. Siyo sisi tunaokataa majadiliano, ni wao,” Putin ameiambia televisheni ya serikali, Rossiya 1, katika mahojiano yaliyopeperushwa Jumapili.

Mshauri wa Rais wa Ukraine Volodymyr Zelenskiy amesema Putin anatakiwa kutambua ukweli wa mambo na kukiri kuwa ilikuwa ni Russia ambayo haitaki mazungumzo.

“Russia iliishambulia Ukraine na inaua raia,” mshauri huyo, Mykhailo Podolyal ameandika kwenye Twitter.

Ameongeza kuwa “Russia haitaki mazungumzo, lakini inajaribu kukwepa uwajibikaji wake.”

Uvamizi wa Russia wa Februari 24 ulisababisha mzozo mbaya zaidi barani Ulaya tangu vita vya pili vya dunia na uhasama mkubwa baina ya Moscow na nchi za magharibi tangu mzozo wa makombora wa Cuba mwaka 1962.