Maafisa wa Russia wanaoshikilia Kherson wamesema kwamba jeshi la Ukraine limekomboa tena baadhi ya makazi katika mkoa huo. Rais wa Ukraine katika hotuba yake kwa taifa Jumapili usiku, amesema kwamba vikosi vyake vimekomboa makazi ya Arkhanhelski na Myroliubivka. Russia haijasema lolote kufuatia hatua ya Ukraine ya kuchukua tena mji wa Lyman ingawa Jumamosi ilisema kwamba vikosi vyake vinaondoka mjini humo kwa hofu ya kuzingirwa na vikosi vya Ukraine.
Russia iliuteka mji huo mwezi Mei, na tangu wakati huo imekuwa ikiutumia kama kitovu cha kiufundi pamoja na shughuli za usafirishaji, kwenye operesheni kaskazini mwa mkoa wa Donetsk. Kuchukiliwa tena kwa Lyman ni ushindi mkubwa sana kwa vikosi vya Ukraine tangu vilipoingia kwenye mkoa wa Kharkiv kaskazini mashariki mwa nchi mwezi uliopita, na kuvisukuma vikosi vya Russia kelekea kwenye mpaka.