Ukraine inasema imechukua tena kilomita mraba 37 mashariki na kusini mwa nchi

Naibu waziri wa ulinzi Hanna Maliar alisema kwenye mtandao wa telegram kwamba wanajeshi wa Ukraine wanasonga mbele katika eneo la Bakhmut mashariki mwa nchi, huku Russia ikifanya mashambulizi katika maeneo ya Lyman, Adviika na Mariinka.

Maliar alisema mapigano makali yanaendelea katika maeneo hayo.

Maliar alisema maeneo mengi yaliyochukuliwa yanapatikana kusini mwa nchi, ambapo kilomita mraba 28 zilichukuliwa tena wiki iliyopita. Aliongeza kuwa jeshi la Ukraine limekua likiendesha operesheni za mashambulizi katika maeneo ya Melitopol na Berdyansk.

Ukraine mapema mwezi Juni ilianzisha mashambulizi ya kuchukua tena maeneo yanayodhibitiwa na Russia tangu ilipoanzisha uvamizi wake dhidi ya Ukraine mwezi Februari mwaka wa 2022.