Russia yaituhumu Ukraine kuushambulia mji wa Moscow kwa kutumia ndege isiyo na rubani

Wizara ya ulinzi ya Russia imesema kuwa aidha ilizitungua au kuzizuia ndege nane zisizo na rubani ambazo zilikuwa zinailenga eneo la Moscow.

Meya wa Moscow Sergei Sobyanin amesema shambulizi hilo liliharibu majengo mawili ya makazi na kujeruhi watu wawili.

Msemaji wa Kremlin Dmitry Peskov amewaambia waandishi wa habari kwamba Rais Vladimir Putin alipewa taarifa kuhusu hali hiyo.

Maafisa wa Ukraine walikuwa hawajatoa maelezo kuhusu madai hayo ya Russia.

Shambulio hilo linafuatia lile la mapema mwezi Mei ambalo maafisa wa Russia walisema liliilenga Kremlin. Russia iliituhumu Ukraine kwa shambulio hilo.

Mapema Jumanne, Russia ilifanya kile maafisa wa Ukraine walichokiita shambulio kubwa lililoulenga mji wa Kyiv kwa kutumia zaidi ya ndege 20 zisizo na rubani ambazo ziliharibiwa na mifumo ya ulinzi ya Ukraine.