Washambuliaji wasiojulikana waliingia kwenye kanisa la Kikatoliki la Saint Francis na kuwashambulia kwa bunduki na vipulizi waumini waliokua wanahudhuria ibada ya asubuhi Jumapili.
Adelegbe Timileyin mbunge wa wilaya ya Owo katika bunge la Nigeria, amewaambia waandishi habari kwamba kasisi aliyekuwa anaongoza ibada ametekwa nyara na miongoni mwa waliofariki walikuwemo watoto wengi.
Maafisa wa usalama hawajatoa idadi ya waliofariki, lakini Timileyin anasema anadhani hadi watu 50 wameuliwa, ingawa anasema kwamba huenda idadi itakuwa kubwa zaidi.
Papa Francis aliyearifiwa kuhusu shambulio hilo alitoa taarifa akisema "ninawaombea waathirika na nchi nzima, kutokana na msiba huu uliotokea wakati wa kusherehekea Pentekoste."
Haijafahamika bado nani aliyehusika na shambulio hilo ambalo ni nadra kutokea kwenye jimbo hilo, licha ya kwamba baadhi ya majimbo ya Nigeria yamekua yakishuhudia mashambulio ya mara kwa mara yakifanywa na wanamgambo wenye itikadi kali na magenge ya wahuni.