Shirika hilo linasema kwamba hadi watu milioni 7 wana uhaba mkubwa sana wa chakula huku wakikabiliwa na baa la njaa. Watu hao ni pamoja na wengine zaidi ya milioni 5.2 walioko jimboni Tigray wanaotegemea msaada wa chakula kutoka Umoja wa mataifa ili kuishi.
WFP inasema kwamba ghasia ambazo sasa zimeenea kwenye eneo lote kaskazini mwa Ethiopia zimesababisha watu wengine milioni 1.7 kukabiliwa na njaa.Mwezi huu WFP imeanza kupeleka chakula cha dharura kwa watu kaskazini mwa Ethiopia ikiongeza kusema kwamba wanapanga kuwafikia watu 530,000 jimboni Afar pamoja na wengine 250,000 kwenye jimbo la Amhara.
Wakati huo huo msemaji wa WFP huko Tigary Tomson Phiri amesema kwamba wakati hali ikiendelea kudorora , mashirika ya misaada yanajitahidi kupeleka chakula cha dharura kwa zaidi ya watu milioni 5 kote kwenye jimbo hilo. "Akiba ya chakula tulichokuwa nacho kilikuwa karibu kumalizika siku mbili zilizopita hadi pale msafara wa kwanza wa msaada ulipofanikiwa kuingia jimboni humo baada ya muda wa wiki mbili. WFP iliongoza msafara wa zaidi ya malori 100 yakiwa na tani 3,500 za chakula pamoja na bidhaa nyingine kama vile dawa, mafuta na mahema," Amesema Phiri.
Phiri aliongeza kwamba WFP imeweza kupeleka malori 355 tu ya misaada tangu katikati ya mwezi Julai. Amesema kwamba ingawa msaada huo unaonekana kuwa mwingi, ni chini ya asilimia 10 ya msaada unaohitajika jimboni humo, na kwamba malori 100 yanahitajika kila siku huko Tigray ili kukidhi mahitaji.
Ameongeza kusema kwamba mara nyingi malori yanakwama Afar kutokana na urasimu na vizingiti vilivyowekwa pamoja na kupita kwenye vituo vya ukaguzi. Anasema kwamba baadhi ya malori yameshambuliwa na watu wa jamii nyingine na misaada ikiporwa.
WFP inaomba ufadhili wa dola milioni 426 ili kuendeleza operesheni ya upelekaji wa misaada kwa takriban watu milioni 12 kote nchini Ethiopia mwaka huu. Shirika hilo limeongeza kusema kwamba litalazimika kukata mgao wa misaada kwa watu wa kaskazini mwa Ethiopia iwapo hawatapata ufadhili zaidi.
Shirika hilo linasema kwamba huenda likasitisha upelekaji wa chakula kwa takriban watu milioni 4 walioko Tigary, Afar na Amhara katika miezi michache ijayo iwapo wataishiwa na fedha.
Novemba 4 mwaka huu itakuwa mwaka mmoja tangu serikali kuu ya Ethiopia ilipoanza operesheni za kijeshi kwa nia ya kumaliza udhibiti wa TPLF kwenye eneo la Tigray.