Kuzuka kwa mapigano siku nane zilizopita kati ya jeshi la Sudan na kikosi cha wanamgambo cha Rapid Support Forces (RSF) kulisababisha mzozo wa kibinadamu, na kuua watu 420 na mamilioni ya raia wa Sudan wakiwa wamekwama wakiwa hawana fursa za huduma za msingi.
Wakati watu wanajaribu kukimbia machafuko, nchi zimeanza kupeleka ndege zao na kuandaa misafara mjini Khartoum ili kuwaondoa raia wao. Baadhi ya raia wa kigeni walijeruhiwa.
Mwandishi wa Reuters amesema milio ya risasi ilisikika kote mjini humo na moshi mweusi umetanda angani.
Pande zinazozozana zimeshtumiana kwa kuushambulia msafara wa Ufaransa, kila upande ukisema raia mmoja wa Ufaransa alijeruhiwa. Wizara ya mambo ya nje ya Ufaransa ambayo awali ilisema ilikuwa inawaondoa wafanyakazi wa ubalozi na raia wake, haikutoa maoni yoyote.
Ufaransa imesema ndege ya Ufaransa iliyokuwa imebeba watu 100 ukiwemo ujumbe wa Umoja wa Ulaya mjini Khartoum pamoja na raia wengine iliondoka kuelekea Djibouti, na ndege ya pili iliyokuwa na idadi kama hiyo ilitarajiwa kuondoka muda mfupi baadaye.
Juhudi za kuwaondoa wakazi wa kigeni zimewakasirisha baadhi ya Wasudan ambao wamehisi kuwa pande hasimu zimeonyesha kuwa hazijali usalama wa wenyeji.