Mkurugenzi mtendaji wa Mwananchi, Francis Nanai akizungumza na Sauti ya Amerika anasema wametoa taarifa Jumatatu baada ya kupokea habari kutoka kwa familia yake kwamba Gwanda ametoweka tangu Novemba 21 mjini Kibiti karibu na Dar es Salaam.
Nanai anasema kwa vile ni mwandishi wa kujitegemea hajakuwa na mawasiliano ya kila siku na kampuni isipokuwa wakati kuna habari muhimu ya kuripoti na hivyo hakuna mawasiliano ya siku hadi siku na Gwanda.
Anasema mara ya mwisho kuwasiliana na mwandishi huyo wa Mwananchi ilikuwa Novemba 20 na tangu wakati huo hapatikani kwenye simu zake tatu.
Gwanda mwenye umri wa miaka 42 amekua akiandika mfululizo wa ripoti juu ya kutoweka kwa raia na maafisa wa usalama katika mji wa Kibiti, na haifahamiki ikiwa hiyo ndio sababu ya kutekwa kwake.