Mwanariadha wa kenya Geoffrey Mutai ameweka rekodi mpya ya dunia katika mbio ndefu za marathon kwa kushinda mbio za Boston marathon Jumatatu katika muda wa saa mbili, dakika tatu na sekunde 02. Naye Caroline Kilel wa Kenya pia alishinda upande wa wanawake katika muda wa saa mbili, dakika 22 na sekunde 36.
Wakenya kwa jumla walitawala mbio hizo. Kwa upande wa wanaume Moses Mosop alichukua nafasi ya pili katika muda wa saa 2, dakika 3 na sekunde 06 akifuatiwa na Gebregziabher Gebremariam wa Ethiopia katika muda wa saa 2, dakika 4 na sekunde 53. Robert Kiprono Cheruiyot na Philip Kimutai Sanga wote wa Kenya walimaliza katika nafasi za sita na saba.
Caroline Kilel
Kinadada wa Kenya nao pia walitawala mbio za wanawake. Kufuatia ushindi wa Caroline, nafasi ya pili ilichukuliwa na Mmarekani Desiree Davila aliyemaliza katika muda wa saa 2, dakika 22 na sekunde 38. nafasi ya tatu ilikwenda kwa Sharon Cherop aliyemaliza katika muda wa saa 2, dakika 22 na sekunde 42 na Mkenya mwingine Caroline Rotich alichukua nafasi ya nne katika muda wa saa 2, dakika 24 na sekunde 52. Alice Timbili alimaliza katika nafasi tisa.