Korea Kaskazini yakaribisha wajumbe kutoka Russia na China kwenye maadhimisho ya siku kuu ya Ushindi

Hafla hiyo imeonekana kuwa siku muhimu kidiplomasia baada ya miaka kadhaa tangu ilipozuia wageni kutokana na janga la corona. Waziri wa ulinzi wa Russia Sergei Shoigu na kiongozi wa kisiasa wa China Li Hongzhong wamewasilisha barua kwa Kim kutoka kwa viongozi wa mataifa yao, Vladimir Putin na Xi Jingping, kulingana na chombo cha habari cha taifa hilo cha KCNA.

Chombo hicho kimeongeza kusema kwamba barua hizo zimepokelewa kwa furaha, wakati Kim akisifu urafiki wa miongo mingi na mataifa hayo. Wajumbe wanaozuru walialikwa kwenye utumbuizaji wa muziki usiku wa manane, ili kusherehekea ushindi uliyotangazwa na serikali dhidi ya uvamizi wa Marekani.

Vita vya Korea vya 1950-53 vinachukuliwa kuwa ushindi kwa Korea Kaskazini wakati vikielezewa nchini humo kwamba vilianzishwa na Marekani pamoja na washirika wake.